Четверток Страстной седмицы. ЦСл текст гражданским шрифтом.

Во время оно, приближашеся праздник опреснок, глаголемый Пасха: и искаху архиерее и книжницы, како бы убили Его: бояхуся бо людей. Вниде же сатана во Иуду нарицаемаго Искариот, суща от числа обоюнадесяте. И шед глагола архиереом и воеводам, како Его предаст им. И возрадовашася, и совещаша ему сребреники дати: и исповеда {обещася}, и искаше удобна времене, да предаст Его им без народа. Прииде же день опресноков, воньже подобаше жрети пасху: и посла Петра и Иоанна, рек: шедша уготовайта нам пасху, да ямы. Она же рекоста Ему: где хощеши уготоваем? Он же рече има: се восходящема вама во град, срящет вы человек в скудельнице воду нося: по нем идета в дом, воньже входит, и рцета дому владыце: глаголет тебе Учитель: где есть обитель, идеже пасху со ученики Моими снем? И той вама покажет горницу велию постлану: ту уготовайта. Шедша же обретоста, якоже рече има: и уготоваста пасху. И егда бысть час, возлеже, и обанадесяте апостола с Ним. И рече к ним: желанием возжелех сию пасху ясти с вами, прежде даже не прииму мук: глаголю бо вам, яко отселе не имам ясти от нея, дондеже скончаются во Царствии Божии. И приим чашу, хвалу воздав, рече: приимите сию, и разделите себе: глаголю бо вам, яко не имам пити от плода лознаго, дондеже Царствие Божие приидет. И приим хлеб, хвалу воздав преломи, и даде им, глаголя: сие есть тело Мое, еже за вы даемо: сие творите в мое воспоминание. Такожде же и чашу по вечери, глаголя: сия чаша Новый Завет Моею кровию, яже за вы проливается: обаче се, рука предающаго Мя со мною (есть) на трапезе, и Сын убо Человеческий идет по реченному {по предуставленному совету}: обаче горе человеку тому, имже предается. И тии начаша искати в себе, который убо от них хощет сие сотворити. Бысть же и пря в них, кий мнится их быти болий. Он же рече им: царие язык господствуют ими, и обладающии ими благодателе нарицаются. Вы же не тако: но болий в вас, да будет яко мний: и старей, яко служай. Кто бо болий, возлежай ли, или служай? не возлежай ли? Аз же посреде вас есмь яко служай. Вы же есте пребывше со Мною в напастех Моих: и Аз завещаваю вам, якоже завеща Мне Отец Мой, Царство, да ясте и пиете на трапезе Моей во Царствии Моем: и сядете на престолех, судяще обеманадесяте коленома Израилевома. Рече же Господь: Симоне, Симоне, се сатана просит вас, да бы сеял, яко пшеницу: Аз же молихся о тебе, да не оскудеет вера твоя: и ты некогда обращься утверди братию твою. Он же рече Ему: Господи, с Тобою готов есмь и в темницу и на смерть ити. Он же рече: глаголю ти, Петре, не возгласит петель днесь, дондеже трикраты отвержешися Мене не ведети. И рече им: егда послах вы без влагалища и без меха и без сапог, еда чесого лишени бысте? Они же реша: ничесоже. Рече же им: но ныне иже имать влагалище, да возмет, такожде и мех: а иже не имать, да продаст ризу свою, и купит нож. Глаголю бо вам, яко еще писаное се, подобает, да скончается о Мне, еже: и со беззаконными вменися. Ибо еже о Мне, кончину имать. Они же реша: Господи, се ножа зде два. Он же рече им: доволно есть. И изшед иде по обычаю в гору Елеонскую: по Нем же идоша ученицы Его.


Братие, аз приях от Господа, еже и предах вам, яко Господь Иисус в нощь, в нюже предан бываше, приемь хлеб, и благодарив преломи, и рече: приимите, ядите, сие есть Тело Мое, еже за вы ломимое: сие творите в Мое воспоминание. Такожде и чашу по вечери, глаголя: сия чаша новый завет есть в Моей Крови: сие творите, елижды аще пиете, в Мое воспоминание. Елижды бо аще ясте хлеб сей и чашу сию пиете, смерть Господню возвещаете, дондеже приидет. Темже иже аще яст хлеб сей или пиет чашу Господню недостойне, повинен будет Телу и Крови Господни. Да искушает же человек себе, и тако от хлеба да яст и от чаши да пиет. Ядый бо и пияй недостойне, суд себе яст и пиет, не разсуждая тела Господня. Сего ради в вас мнози немощни и недужливи, и спят (усыпают) доволни. Аще бо быхом себе разсуждали, не быхом осуждени были. Судими же, от Господа наказуемся, да не с миром осудимся.


Рече Господь Своим учеником: Весте, яко по двою дню Пасха будет, и Сын Человеческий предан будет на пропятие. Тогда собрашася архиерее и книжницы и старцы людстии во двор архиереов, глаголемаго Каиафы, и совещаша, да Иисуса лестию имут и убиют: Глаголаху же: но не в праздник, да не молва будет в людех. Иисусу же бывшу в Вифании, в дому Симона прокаженнаго, приступи к Нему жена, сткляницу мира имущи многоценнаго, и возливаше на главу Его возлежаща. Видевше же ученицы его негодоваша, глаголюще: чесо ради гибель сия (бысть)? Можаше бо сие миро продано быти на мнозе и датися нищим. Разумев же Иисус рече им: что труждаете жену? дело бо добро содела о Мне: Всегда бо нищия имате с собою, Мене же не всегда имате: Возлиявши бо сия миро сие на тело Мое, на погребение Мя сотвори: Аминь глаголю вам: идеже аще проповедано будет Евангелие сие во всем мире, речется и еже сотвори сия, в память ея. Тогда шед един от oбоюнадесяте, глаголемый Иуда Искариотский, ко архиереом, рече: что ми хощете дати, и аз вам предам Его? Oни же поставиша ему тридесять сребреник: и оттоле искаше удобна времене, да Его предаст. В первый же день опресночный приступиша ученицы ко Иисусу, глаголюще Ему: где хощеши уготоваем Ти ясти пасху? Oн же рече: идите во град ко oнсице, и рцыте ему: Учитель глаголет: время Мое близ есть: у тебе сотворю пасху со ученики Моими. И сотвориша ученицы, якоже повеле им Иисус, и уготоваша пасху. Вечеру же бывшу, возлежаше со oбеманадесяте ученикома. Ведый Иисус, яко вся даде Ему Oтец в руце, и яко от Бога изыде и к Богу грядет: Воста от вечери, и положи ризы, и прием лентион, препоясася: Потом влия воду во умывальницу, и начат умывати ноги учеником и отирати лентием, имже бе препоясан. Прииде же к Симону Петру, и глагола Ему той: Господи, Ты ли мои умыеши нозе? Отвеща Иисус и рече ему: еже Аз творю, ты не веси ныне, уразумееши же по сих. Глагола Ему Петр: не умыеши ногу моею во веки. Отвеща ему Иисус: аще не умыю тебе, не имаши части со Мною. Глагола Ему Симон Петр: Господи, не нозе мои токмо, но и руце и главу. Глагола ему Иисус: измовенный не требует, токмо нозе умыти, есть бо весь чист: и вы чисти есте, но не вси. Ведяше бо предающаго Его: сего ради рече, яко не вси чисти есте. Егда же умы ноги их, прият ризы Своя, возлег паки, рече им: весте ли, что сотворих вам? Вы глашаете Мя Учителя и Господа: и добре глаголете, есмь бо. Аще убо Аз умых ваши нозе, Господь и Учитель, и вы должни есте друг другу умывати нозе: Образ бо дах вам, да, якоже Аз сотворих вам, и вы творите. Аминь, аминь глаголю вам: несть раб болий господа своего, ни посланник болий пославшаго его. Аще сия весте, блажени есте, аще творите я. И ядущим им, рече: аминь глаголю вам, яко един от вас предаст Мя. И скорбяще зело, начаша глаголати Ему един кийждо их: еда аз есмь, Господи? Oн же отвещав рече: омочивый со Мною в солило руку, той Мя предаст: Сын убо Человеческий идет, якоже есть писано о Нем: горе же человеку тому, имже Сын Человеческий предастся: добро бы было ему, аще не бы родился человек той. Отвещав же Иуда предаяй Его, рече: еда аз есмь, Равви? Глагола ему: ты рекл еси. Ядущим же им, прием Иисус хлеб и благословив преломи, и даяше учеником, и рече: приимите, ядите: сие есть Тело Мое. И прием чашу и хвалу воздав, даде им, глаголя: пийте от нея вси: Сия бо есть Кровь Моя, Новаго Завета, яже за многия изливаема во оставление грехов. Глаголю же вам, яко не имам пити отныне от сего плода лознаго, до дне того, егда е пию с вами ново во Царствии Oтца Моего. И воспевше изыдоша в гору Елеонску. Тогда глагола им Иисус: вси вы соблазнитеся о Мне в нощь сию: писано бо есть: поражу пастыря, и разыдутся oвцы стада: По воскресении же Моем варяю вы в Галилеи. Отвещав же Петр рече Ему: аще и вси соблазнятся о Тебе, аз никогдаже соблажнюся. Рече ему Иисус: аминь глаголю тебе, яко в сию нощь, прежде даже алектор не возгласит, трикраты отвержешися Мене. Глагола Ему Петр: аще ми есть и умрети с Тобою, не отвергуся Тебе. Такожде и вси ученицы реша. Тогда прииде с ними Иисус в весь, нарицаемую Гефсиманиа, и глагола учеником: седите ту, дондеже шед помолюся тамо. И поем Петра и oба сына Зеведеова, начат скорбети и тужити. Тогда глагола им Иисус: прискорбна есть душа Моя до смерти: пождите зде и бдите со Мною. И прешед мало, паде на лицы Своем, моляся и глаголя: Oтче Мой, аще возможно есть, да мимоидет от Мене чаша сия: oбаче не якоже Аз хощу, но якоже Ты. Явися же Ему Ангел с небесе, укрепляя Его. И быв в подвизе, прилежнее моляшеся: бысть же пот Его яко капли крове каплющия на землю. И востав от молитвы, и пришед ко учеником, обрете их спящих от печали и глагола Петрови: тако ли не возмогосте единаго часа побдети со Мною? Бдите и молитеся, да не внидете в напасть: дух убо бодр, плоть же немощна. Паки вторицею шед помолися, глаголя: Oтче мой, аще не может сия чаша мимоити от Мене, аще не пию ея, буди воля Твоя. И пришед обрете их паки спящих: беста бо им oчи отяготене. И оставль их, шед паки, помолися третицею, тожде слово рек. Тогда прииде ко учеником Своим и глагола им: спите прочее и почивайте: се, приближися час, и Сын Человеческий предается в руки грешников: Востаните, идем: се, приближися предаяй Мя. И еще Ему глаголющу, се, Иуда, един от обоюнадесяте, прииде, и с ним народ мног со oружием и дрекольми, от архиерей и старец людских. Предаяй же Его даде им знамение, глаголя: Егоже аще лобжу, Той есть: имите Его. И абие приступль ко Иисусови, рече: радуйся, Равви. И облобыза Его. Иисус же рече ему: друже, (твори,) на неже еси пришел (друже, на сие ли пришел еси). Тогда приступльше возложиша руце на Иисуса и яша Его. И се, един от сущих со Иисусом, простер руку, извлече нож свой, и удари раба архиереова, и уреза ему ухо. Тогда глагола ему Иисус: возврати нож твой в место его: вси бо приемшии нож ножем погибнут: Или мнится ти, яко не могу ныне умолити Oтца Моего, и представит Ми вящше неже дванадесяте легеона Ангел? Како убо сбудутся писания, яко тако подобает быти? В той час рече Иисус народом: яко на разбойника ли изыдосте со оружием и дрекольми яти Мя? по вся дни при вас седех уча в церкви, и не ясте Мене. Се же все бысть, да сбудутся писания пророческая. Тогда ученицы вси оставльше Его бежаша. (Воини) же емше Иисуса ведоша к Каиафе архиереови, идеже книжницы и старцы собрашася. Петр же идяше по Нем издалеча до двора архиереова: и вшед внутрь, седяше со слугами, видети кончину. Архиерее же и старцы и сонм весь искаху лжесвидетелства на Иисуса, яко да убиют Его, и не обретаху: и многим лжесвидетелем приступльшим, не обретоша. Послежде же приступивша два лжесвидетеля, реста: Сей рече: могу разорити церковь Божию и треми денми создати ю. И востав архиерей рече Ему: ничесоже ли отвещаваеши, что сии на Тя свидетелствуют? Иисус же молчаше. И отвещав архиерей рече Ему: заклинаю Тя Богом живым, да речеши нам, аще Ты еси Христос, Сын Божий? Глагола ему Иисус: ты рекл еси: oбаче глаголю вам: отселе узрите Сына Человеческаго седяща одесную силы и грядуща на облацех небесных. Тогда архиерей растерза ризы своя, глаголя, яко хулу глагола: что еще требуем свидетелей? се, ныне слышасте хулу Его: Что вам мнится? Oни же отвещавше реша: повинен есть смерти. Тогда заплеваша лице Его и пакости Ему деяху (и по ланитома бияху его): oвии же за ланиту удариша (заушаху его), глаголюще: прорцы нам, Христе, кто есть ударей Тя? Петр же вне седяше во дворе. И приступи к нему едина рабыня, глаголющи: и ты был еси со Иисусом Галилейским. Oн же отвержеся пред всеми, глаголя: не вем, что глаголеши. Изшедшу же ему ко вратом, узре его другая, и глагола сущим тамо: и сей бе со Иисусом Назореом. И паки отвержеся с клятвою, яко не знаю Человека. Помале же приступивше стоящии, реша Петрови: воистинну и ты от них еси, ибо беседа твоя яве тя творит. Тогда начат ротитися и клятися, яко не знаю Человека. И абие петель возгласи. И помяну Петр глагол Иисусов, реченный ему, яко прежде даже петель не возгласит, трикраты отвержешися Мене. И изшед вон плакася горько. Утру же бывшу, совет сотвориша вси архиерее и старцы людстии на Иисуса, яко убити Его: И связавше Его ведоша и предаша Его Понтийскому Пилату игемону.


Во время оно, прежде же праздника Пасхи, ведый Иисус, яко прииде Ему час, да прейдет от мира сего ко Отцу, возлюбль Своя сущыя в мире, до конца возлюби их. И вечери бывшей, диаволу уже вложившу в сердце Иуде Симонову Искариотскому, да Его предаст, ведый Иисус, яко вся даде Ему Отец в руце, и яко от Бога изыде и к Богу грядет: воста от вечери и положи ризы, и приемь лентион, препоясася: потом влия воду во умывалницу и начат умывати ноги учеником и отирати лентием, имже бе препоясан. Прииде же к Симону Петру, и глагола Ему той: Господи, Ты ли мои умыеши нозе? Отвеща Иисус и рече ему: еже Аз творю, ты не веси ныне, уразумееши же по сих. Глагола Ему Петр: не умыеши ногу моею во веки. Отвеща ему Иисус: аще не умыю тебе, не имаши части со Мною. Глагола Ему Симон Петр: Господи, не нозе мои токмо, но и руце и главу. Глагола ему Иисус: измовенный не требует, токмо нозе умыти, есть бо весь чист: и вы чисти есте, но не вси. Ведяше бо предающаго Его: сего ради рече, яко не вси чисти есте.


Во время оно, егда же умы Иисус ноги учеников, прият ризы Своя, возлег паки, рече им: весте ли, что сотворих вам? Вы глашаете Мя Учителя и Господа, и добре глаголете: есмь бо. Аще убо Аз умых ваши нозе, Господь и Учитель, и вы должни есте друг другу умывати нозе: образ бо дах вам, да, якоже Аз сотворих вам, и вы творите. Аминь, аминь глаголю вам: несть раб болий господа своего, ни посланник болий пославшаго его. Аще сия весте, блажени есте, аще творите я.