В четверток 3-я седмицы Великаго Поста. ЦСл текст гражданским шрифтом.

Тако глаголет Господь: будет в день оный корень Иессеов, и востаяй владети языки, на того языцы уповати будут: и будет покой его, честь. И будет в день оный, приложит Господь показати руку Свою, еже возревновати по останку прочему людей, иже аще останет от Ассириов, и от Египта, и Вавилона, и от Ефиопии, и от Еламитов, и от востоков солнца, и от Аравии, и от островов морских. И воздвигнет знамение в языки, и соберет погибшия Израилевы, и расточенныя Иудины соберет от четырех крил земли. И отымется ревность Ефремова, и врази Иудины погибнут: Ефрем не возревнует Иуде, и Иуда не оскорбит Ефрема. И полетят в кораблях иноплеменничих, море купно пленят, и сущих от восток солнца, и Идумею: и на Моава первее руки возложат, сынове же Аммони первии покорятся. И опустошит Господь море Египетское, и возложит руку Свою на реку духом пресильным: и поразит на седмь дебрий, якоже преходити ю во обувении: И будет прошествие людем Моим оставльшим во Египте, и будет Израилю, якоже в день, егда изыде от земли Египетския. И речеши в день оный: благословлю Тя, Господи, яко разгневался еси на мя, и отвратил еси ярость Твою [от мене,] и помиловал мя еси. Се Бог мой, Спас мой, уповая буду на Него, и не убоюся: зане слава моя и похвала моя Господь, и бысть ми во спасение.


Бысть в шестьсотное лето в житии Ноеве, втораго месяца, в двадесять седмый день месяца, в день той разверзошася вси источницы бездны, и хляби небесныя отверзошася. И бысть дождь на землю четыредесять дней, и четыредесять нощей. В день той вниде Ное, Сим, Хам, Иафет, сынове Ноевы, и жена Ноева, и три жены сынов его с ним в ковчег. И вси зверие земнии по роду, и вси скоти по роду, и всякий гад движущийся на земли по роду, и всякая птица пернатая по роду своему: Внидоша к Ною в ковчег два два, мужеский пол и женский, от всякия плоти, в нейже есть дух животный. И входящая мужеский пол и женский от всякия плоти внидоша к Ною в ковчег, якоже заповеда Господь Бог Ною: и затвори Господь Бог ковчег отвне его. И бысть потоп четыредесять дней, и четыредесять нощей на земли, и умножися вода, и взя ковчег, и возвысися от земли: И возмогаше вода, и умножашеся зело на земли, и ношашеся ковчег верху воды. Вода же возмогаше зело зело на земли: и покры вся горы высокия, яже бяху под небесем: Пятьнадесять лактей горе возвысися вода, и покры вся горы высокия. И умре всякая плоть движущаяся по земли, птиц и скотов и зверей, и всякий гад движущийся на земли, и всякий человек. И вся елика имут дыхание жизни, и все еже бе на суши, умре. И потребися всякое востание, еже бяше на лице всея земли, от человека даже до скота, и гадов, и птиц небесных, и потребишася от земли: и оста Ное един, и иже с ним в ковчезе. И возвысися вода над землею дней сто пятьдесят. И помяну Бог Ноа, и вся звери, и вся скоты, и вся птицы, и вся гады пресмыкающияся, елика беху с ним в ковчезе: и наведе Бог дух на землю, и преста вода. И заключишася источницы бездны, и хляби небесныя: и удержася дождь от небесе. И вспять пойде вода, идущая от земли: и умаляшеся вода, по сте пятидесятих днех.


Сын премудр веселит отца: сын же безумен печаль матери. Не пользуют сокровища беззаконных, правда же избавит от смерти. Не убиет гладом Господь душу праведную, живот же нечестивых низвратит. Нищета мужа смиряет: руце же мужественных обогащаются. Сын наказан премудр будет, безумный же слугою употребится: спасется от зноя сын разумный, ветротленен же бывает на жатве сын беззаконный. Благословение Господне на главе праведнаго: уста же нечестивых покрыет плачь безвременный. Память праведных с похвалами: имя же нечестивых угасает. Премудр сердцем приимет заповеди: непокровенный же устнама остроптевая запнется. Иже ходит просто, ходит надеяся: развращая же пути своя, познан будет. Намизаяй оком с лестию, собирает мужем печали: обличаяй же со дерзновением, миротворит. Источник жизни в руце праведнаго: уста же нечестиваго покрыет пагуба. Ненависть воздвизает распрю: всех же нелюбопрительных покрывает любовь. Иже от устен произносит премудрость, жезлом биет мужа безсердечна. Премудрии скрыют чувство, уста же продерзаго приближаются сокрушению. Стяжание богатых град тверд: сокрушение же нечестивых нищета. Дела праведных живот творят, плодове же нечестивых грехи. Пути жизни хранит наказание: наказанием же не обличенный заблуждает. Покрывают вражду устне правыя: износящии же укоризну безумнейшии суть. От многословия не избежиши греха: щадяй же устне, разумен будеши. Сребро разжженное язык праведнаго: сердце же нечестиваго исчезнет. Устне праведных ведят высокая: безумнии же в скудости скончаваются. Благословение Господне на главе праведнаго: сие обогащает, и не имать приложитися ему печаль в сердцы.

"При многословии не миновать греха" (Прит. 10, 19). Внимательные к себе христиане все чувства называют окнами души, которые если открыть, уйдет вся внутренняя теплота. Но самое широкое отверстие, просторная дверь, в обилии пропускающая эту теплоту, есть язык, которому дается воля говорить сколько и что хочет. Какой вред вниманию и внутреннему строю наносят все чувства в совокупности, такой же причиняет многословие, ибо оно касается предметов всех чувств и заставляет душу, не видя видеть, не слыша слышать, не осязая осязать. Что внутри мечтание, то вне многословие; но последнее пагубнее, ибо оно фактично и потому более впечатлительно. К тому же, с ним в близкой связи самомнение, дерзость и самочиние - эти, буре подобные, разорители внутреннего строя, оставляющие за собой нечувствие и ослепление. Как после этого избежать греха при многословии?!