В четверток 4-я седмицы Великаго Поста. ЦСл текст гражданским шрифтом.

Тако глаголет Господь: услышите слово Господне мужие озлоблении, и князи людей сущих во Иерусалиме. Яко рекосте, сотворихом завет со адом, и с смертию сложение: буря носима аще мимоидет, не приидет на нас: положихом лжу надежду нашу, и лжею покрыемся. Сего ради тако глаголет Господь: се Аз полагаю во основание Сиону камень многоценен, избран, краеуголен, честен, во основание ему, и веруяй вонь не постыдится. И положу суд в надежду, милость же Моя на мерилех, и уповавшии вотще на лжу: яко не минет вас буря, И не отымет от вас завета смертнаго, и надежда ваша, яже ко аду, не пребудет. буря идущая аще найдет, будете ей в попрание. Егда мимоидет, возмет вас: яко по всяко утро преходити будет в день, в нощи будет надежда зла: научитеся слышати утесняемии: Не можем ратовати, сами же изнемогаем, еже собратися нам. Якоже гора на нечестивых востанет Господь, и будет [якоже] в дебри Гаваонстей, с яростию сотворит дела Своя, горести дело: ярость же Его чуждо употребится, и погубление Его странно. И вы не радуйтеся, ниже да возмогут ваши узы: зане скончаны и сокращены вещи слышах от Господа Саваофа, яже сотворит над всею землею.


Сия племена сынов Ноевых по родом их, по языком их: от сих разсеяшася острови языков на земли по потопе. И бе вся земля устне едине, и глас един всем. И бысть внегда поити им от восток, обретоша поле в земли Сеннаарстей, и вселишася тамо. И рече человек ближнему своему: приидите, сотворим плинфы, и испечем их огнем. и бысть им плинфа в камень, и брение вместо мела. И рекоша: приидите, созиждем себе град и столп, егоже верх будет даже до небесе: и сотворим себе имя, прежде неже разсеятися нам по лицу всея земли. И сниде Господь видети град и столп, егоже созидаша сынове человечестии. И рече Господь: се род един, и устне едине всех, и сие начаша творити: и ныне не оскудеют от них вся, елика аще восхотят творити. Приидите, и сошедше смесим тамо язык их, да не услышат кийждо гласа ближняго [своего]. И разсея их оттуду Господь по лицу всея земли: и престаша зиждуще град и столп. Сего ради наречеся имя его Смешение, яко тамо смеси Господь устна всея земли, и оттуду разсея их Господь по лицу всея земли.


Желания благочестивых наслаждают душу: дела же нечестивых далече от разума. Ходяй с премудрыми премудр будет: ходяй же с безумными познан будет. Согрешающих постигнут злая: праведных же постигнут благая. Благ муж наследит сыны сынов: сокровиществуется же праведным богатство нечестивых. Праведнии насладятся в богатстве лета многа: неправеднии же погибнут вскоре. Иже щадит жезл [свой,] ненавидит сына своего: любяй же наказует прилежно. Праведный ядый насыщает душу свою: души же нечестивых скудны. Мудрыя жены создаша домы: безумная же раскопа рукама своима. Ходяй право, боится Господа: развращаяй же пути своя, обезчестится. Из уст безумных жезл досаждения: устне же мудрых хранят я. Идеже несть волов, ясли чисты: а идеже жита многа, явна волу крепость. Свидетель верен не лжет: разжизает же ложная свидетель неправеден. Взыщеши премудрости у злых, и не обрящеши: чувство же у мудрых удобно.

"Иже щадит жезл свой, ненавидит сына: любяй же наказует прилежно " (Прит. 13, 25). Оставим детей и займемся собою. В отношении к каждому это значит вот что: не щади себя, прилежно наказывай. Саможаление - корень всех наших поползновений на грех. Кто же не снисходит себе, тот всегда тверд в добре. Больше всего держать надо в самой строгой дисциплине плоть, эту рабу несмысленную. Когда томят ее, она смиренна; а дай ей только малую льготу, уж она начинает показывать когти и свирепеть очами любострастными. Но дивно то, что, хоть не говори, все стоят за плоть и всякие ей выдумывают угодья. Даже наука будто бы без этого нейдет. Что же это должно быть за наука такая?