В четверток 1-я седмицы Великого поста. ЦСл текст гражданским шрифтом

Бысть в лето, в неже умре Озиа царь, видех Господа седяща на престоле высоце, и превознесенне, и исполнь дом славы Его. И серафими стояху окрест Его, шесть крил единому, и шесть крил другому: и двема убо покрываху лица своя, двема же покрываху ноги своя, и двема летаху. И взываху друг ко другу, и глаголаху: Свят, Свят, Свят Господь Саваоф: исполнь вся земля славы Его. И взяся наддверие от гласа, имже вопияху, и дом наполнися дыма. И рекох: о окаянный аз, яко умилихся, яко человек сый, и не чисты устне имый, посреде людей нечистыя устне имущих аз живу: и Царя Господа Саваофа видех очима моима. И послан бысть ко мне един от серафимов, и в руце своей имяше угль горящ, егоже клещами взят от олтаря, и прикоснуся устнам моим, и рече: се прикоснуся сие устнам твоим, и отымет беззакония твоя, и грехи твоя очистит. И слышах глас Господа глаголюща: кого послю и кто пойдет к людем сим? И рекох: се аз есмь, посли мя. И рече: иди и рцы людем сим: слухом услышите, и не уразумеете: и видяще, узрите, и не увидите: одебеле бо сердце людей сих, и ушима своима тяжко слышаша, и очи свои смежиша: да не когда узрят очима, и ушима услышат, и сердцем уразумеют, и обратятся и исцелю я. И рекох: доколе Господи? и рече: дондеже опустеют гради, от еже ненаселеным быти, и домы, от еже не быти человеком, и земля останется пуста. И посем продолжит Бог человеки, и умножатся оставльшиися на земли.


Сия книга бытия человеча, воньже день сотвори Бог Адама: по образу Божию сотвори его. Мужа и жену сотвори их, и благослови их: и нарече имя ему Адам, воньже день сотвори их. Поживе же Адам лет двесте тридесять, и роди сына по виду своему, и по образу своему: и нарече имя ему Сиф. Быша же дние Адамовы, яже поживе, по еже родити ему Сифа, лет седмь сот, и роди сыны и дщери. И быша вси дние Адамовы, яже поживе, лет девять сот и тридесять: и умре. Поживе же Сиф лет двесте пять, и роди Еноса: И поживе Сиф, по еже родити ему Еноса, лет седмь сот и седмь, и роди сыны и дщери. И быша вси дние Сифовы, лет девять сот и дванадесять: и умре. И поживе Енос лет сто девятьдесят, и роди Каинана: И поживе Енос, по еже родити ему Каинана, лет седмь сот и пятьнадесять, и роди сыны и дщери. И быша вси дние Еносовы лет девять сот и пять: и умре. И поживе Каинан лет сто седмьдесят, и роди Малелеила. И поживе Каинан, по еже родити ему Малелеила, лет седмь сот и четыредесять, и роди сыны и дщери. И быша вси дние Каинановы, лет девять сот и десять: и умре. И поживе Малелеил лет сто шестьдесят пять, и роди Иареда. И поживе Малелеил, по еже родити ему Иареда, лет седмь сот и тридесять, и роди сыны и дщери. И быша вси дние Малелеиловы, лет осмь сот и девятьдесят пять: и умре. И поживе Иаред лет сто шестьдесят два, и роди Еноха. И поживе Иаред, по еже родити ему Еноха, лет осмь сот, и роди сыны и дщери. И быша вси дние Иаредовы лет девятьсот и шестьдесят два: и умре. И поживе Енох лет сто шестьдесят пять, и роди Мафусала. Угоди же Енох Богу, и поживе Енох, по еже родити ему Мафусала, лет двесте, и роди сыны и дщери. И быша вси дние Еноховы лет триста шестьдесят пять. И угоди Енох Богу, и не обреташеся, зане преложи его Бог.


Твори сыне, яже аз заповедую ти, и спасайся: идеши бо в руце злых за твоего друга, буди не ослабевая: поощряй же и твоего друга, егоже испоручил еси. Не даждь сна твоима очима, ниже да воздремлеши твоима веждома: Да спасешися аки серна от тенет, и яко птица от сети. Иди ко мравию, о лениве, и поревнуй, видев пути его, и буди онаго мудрейший. Он бо не сущу ему земледельцу, ниже нудящаго его имущий, ниже под владыкою сый, готовит в жатву пищу, и многое в лето творит уготование. Или иди ко пчеле, и увеждь, коль делательница есть, делание же коль честное творит: еяже трудов царие и простии во здравие употребляют, любима же есть всеми и славна: аще силою и немощна сущи, [но] премудростию почтена произведеся. Доколе, о лениве, лежиши? Когда же от сна востанеши? Мало убо спиши, мало же седиши, мало же дремлеши, мало же объемлеши перси рукама: Потом же найдет тебе аки зол путник убожество: скудость же аки благий течец. Аще же не ленив будеши, приидет яко источник жатва твоя, скудость же аки злый течец [от тебе] отбежит. Муж безумен и законопреступный ходит в пути не благи: Тойже намизает оком, и знамение дает ногою, учит же помаванием перстов. Развращенно же сердце кует злая: на всякое время таковый мятежы составляет граду. Сего ради внезапу приходит ему погибель, разсечение и сокрушение неисцельное. Яко радуется о всех, ихже ненавидит Бог: сокрушается же за нечистоту души. Око досадителя, язык неправедный, руце проливающия кровь праведнаго: И сердце кующее мысли злы, и нозе тщащиися зло творити, потребятся. Разжизает лжи свидетель неправеден, и насылает суды посреде братий. Сыне, храни законы отца твоего, и не отрини наказания матере твоея.

"Не давай сна глазам твоим и дремания веждам твоим; спасайся как серна из руки и как птица птицелова" (Прит. 6, 4-5). Это правило должен взять себе в руководство всякий, кто положил теперь в сердце своем, перед лицом Господа, жить уже по заповедям Его. И он не должен давать сна очам, - не этим внешним, но внутренним очам ума, чтоб они пристально смотрели в сердце и верно замечали все, происходящее там, и тем давали возможность ревнителю разузнавать вражеские козни и избежать опасности от них. Сердце стало теперь поприще борьбы с врагом. Туда он непрестанно сеет свое, отражающееся в помышлениях, которые, однако, не всегда грубо худы, но большею частью прикрыты мнимою добротою и правотою. Цепь всех помышлений - точно хитросплетенная сеть! Пустившийся, вслед их без внимания не минет опутания, и, следовательно, опасности падения. Вот почему, брат, держи око ума твоего острозорким, посредством строгого внимания ко всему, что происходит в тебе и около тебя. Замечай, что предлагает тебе неотступный советник твой с шуей стороны , и разбирай, для чего оно предлагается тебе, куда поведет, и никогда не попадешь в сети его. Не забудь только, что внимание одно не бывает в силе; но когда стоит в содружестве с трезвением, бодренностию и непрестанною ко Господу молитвою. Сочетай все это и будешь неуловим.