Во вторник 5-я седмицы Великаго Поста. ЦСл текст гражданским шрифтом.

Тако глаголет Господь: кому уподобисте Господа, и коему подобию уподобисте Его? Еда образ сотвори древоделатель, или златарь слияв злато позлати его, или подобием сотвори его? Древо бо негниющее избирает древоделатель, и мудре ищет, како поставит образ его, и да не поколеблется. Не разуместе ли, не слышасте ли? не возвестися ли вам исперва? не разуместе ли основания земли, Содержай круг земли, и живущия на ней аки пруги: поставивый небо яко камару, и простер е, яко скинию обитати. Даяй князи, аки ничтоже, владети, и землю, аки ничтоже сотвори. Не насадят бо, ниже насеют, и не вкоренится в земли корение их: дхне на них ветр, и изсхоша, и буря аки стеблие возмет их. Ныне убо кому Мя уподобисте, и вознесуся, рече Святый? Воззрите на высоту очима вашима, и видите, Кто сотвори сия вся? носяй по числу утварь Свою, и вся по имени прозовет от многия славы, и в державе крепости Своея ничтоже утаися от тебе. Еда бо речеши Иакове, и что глаголал еси Израилю? утаися путь мой от Бога, и Бог мой суд отъя и отступи. И ныне не уразумел ли еси? ни ли слышал еси? Бог вечный, Бог устроивый концы земли, не взалчет, ниже утрудится, ниже есть изобретение премудрости Его. Даяй алчущим крепость, и неболезненным печаль. Взалчут бо юнейшии, и утрудятся юноты, и избраннии не крепцы будут: Терпящии же Господа изменят крепость.


Бысть слово Господне ко Авраму в видении нощию, глаголя: не бойся Авраме: Аз защищаю тя, мзда твоя многа будет зело. Глагола же Аврам: Владыко Господи, что ми даси? аз же отпущаюся безчаден: сын же масек домочадицы моея, сей Дамаск Елиезер. И рече Аврам: понеже мне не дал еси семене, домочадец же мой наследник мой будет. И абие глас Господень бысть к нему, глаголющий: не будет сей наследник твой, но иже изыдет из тебе, той будет наследник тебе. Изведе же его вон, и рече ему: воззри на небо, и изочти звезды, аще возможеши исчести я. и рече: тако будет семя твое. И верова Аврам Богу, и вменися ему в правду. Рече же к нему: Аз [есмь] Бог изведый тя от страны Халдейския, яко дати тебе землю сию наследствовати. И рече: Владыко Господи, по чесому уразумею, яко наследити ю имам? Рече же к нему: возми Мне юницу трилетну, и козу трилетну, и овна трилетна, и горлицу, и голубя. Взя же он вся сия, и раздели я на полы, и положи я противолична едина к другому, птиц же не раздели. Слетеша же птицы на телеса растесаная их: и седе близу их Аврам. Заходящу же солнцу, ужас нападе на Аврама, и се страх темен велий нападе нань. И речено бысть ко Авраму: ведый увеси, яко пресельно будет семя твое в земли не своей, и поработят я, и озлобят я, и смирят я лет четыреста. Языку же, емуже поработают, сужду Аз: по сих же изыдут семо со имением многим. Ты же отыдеши ко отцем твоим в мире, препитан в старости добрей.


Устне мудрых связуются чувством: сердца же безумных не тверда. Жертвы нечестивых мерзость Господеви: обеты же правоходящих приятны Ему. Мерзость Господеви путие нечестивых: гонящия же правду любит. Наказание незлобиваго познавается от мимоходящих: ненавидящии же обличения скончаваются срамно. Ад, и пагуба явна пред Господем: како не и сердца человеков? Не возлюбит ненаказанный обличающих его, с мудрыми же не побеседует. Сердцу веселящуся, лице цветет: в печалех же сущу, сетует. Сердце право ищет чувства: уста же ненаказанных уразумеют злая. На всяко время очи злых приемлют злая: добрии же безмолвствуют присно. Лучше частица малая со страхом Господним, нежели сокровища велия без боязни. Лучше учреждение от зелий с любовию и благодатию, нежели представление тельцев со враждою. Муж ярый устрояет брани: долготерпеливый же и будущую укрощает. терпеливый муж угасит суды: нечестивый же воздвизает паче. Путие праздных постлани тернием: мужественных же углаждени.

"Преисподняя и Аваддон открыты перед Господом, тем более сердца сынов человеческих" (Прит. 15, 11). А грешник все думает, что его никто не видит, и, укрываясь от глаз человеческих темнотою ночи или пустотою места, полагает, что никем не замечен. Божие око видело все; ангел хранитель и совесть были свидетелями. Станешь некогда на суд, тогда все скрытое разоблачится; свидетели неподкупные будут налицо - и умолкнешь. Приговор состоится безапелляционный. Одно средство предотвратить эту неизбежную крайность - покаяние. Дверь к нему отворена. Поспеши войти, пока не пробил час, который ударит, когда - не знаешь, и положит конец и грехам твоим, и всякой надежде помилования.