В понедельник 6-я седмицы Великаго Поста. ЦСл текст гражданским шрифтом.

Тако глаголет Господь, избавивый тя Святый Израилев: Аз есмь Господь Бог твой, научих тя еже обрести, тебе путь, по немуже пойдеши. И аще бы еси послушал заповедей Моих, то был бы убо аки река мир твой, и правда твоя яко волна морская. И было бы яко песок семя твое, и исчадия чрева твоего яко персть земли: ниже ныне потребишися, ниже погибнет имя твое предо Мною. Изыди от Вавилона бежай от халдеев: глас радости возвестите, и да слышано будет сие, возвестите даже до последних земли: глаголите, избави Господь раба Своего Иакова. И аще вжаждут, пустынею проведет их, и воду из камене изведет им, разсядется камень, и потечет вода, и испиют людие Мои. Несть радоватися нечестивым, глаголет Господь. Послушайте Мене острови, и внемлите языцы, временем многим стояти будет, глаголет Господь: от чрева матере Моея нарече имя Мое. И положи уста Моя яко меч остр, и под кровом руки Своея скры Мя: положи Мя яко стрелу избранну, и в туле Своем скры Мя. И рече Ми: раб Мой еси Ты Израилю, и в Тебе прославлюся. Аз же рекох: вотще трудихся, всуе и ни во что дах крепость Мою: сего ради суд Мой пред Господем, и труд Мой пред Богом Моим.

Бысть же, повнегда состаретися Исаакови, и притупишася очи его еже видети: и призва Исава сына своего старейшаго, и рече ему: сыне мой. И рече: се, аз. И рече Исаак: се, состарехся, и не вем дне скончания моего: ныне убо возми орудие твое, тул же и лук, и изыди на поле, и улови ми лов: и сотвори ми снеди, якоже люблю аз: и принеси ми, да ям, яко да благословит тя душа моя, прежде даже не умру. Ревекка же слыша глаголюща Исаака ко Исаву сыну своему. Изыде же Исав на поле уловити лов отцу своему. Ревекка же рече ко Иакову сыну своему меншему: се, аз слышах отца твоего беседующа ко Исаву брату твоему, глаголюща: принеси ми лов, и сотвори ми снеди, да ядый благословлю тя пред Господем, прежде неже умрети ми: ныне убо, сыне мой, послушай мене, якоже аз заповедаю ти: и шед во овцы, поими мне оттуду два козлища мягка и добра, и сотворю я снеди отцу твоему, якоже любит: и внесеши отцу твоему, и будет ясти, яко да благословит тя отец твой, прежде даже не умрет. Рече же Иаков к Ревекце матери своей: Исав брат мой есть муж космат, Аз же муж гладкий: да не како осяжет мя отец мой, и буду пред ним яко презираяй, и наведу на себе клятву, а не благословение. Рече же ему мати: на мне клятва твоя, чадо: точию послушай гласа моего, и шед принеси ми. Шед же взя и принесе матери, и сотвори мати его снеди, якоже любляше отец его. И вземши Ревекка одежду Исава сына своего старейшаго добрую, яже бысть у нея в дому, облече оною Иакова сына своего меншаго, и кожицами козлячими обложи мышцы его, и нагое выи его: и даде снеди и хлебы, яже сотвори, в руце Иакову сыну своему. И внесе отцу своему и рече: отче. Он же рече: се, аз: кто еси ты, чадо? И рече Иаков отцу: аз Исав первенец твой, сотворих, якоже рекл ми еси: востав сяди и яждь от лова моего, яко да благословит мя душа твоя. Рече же Исаак сыну своему: что сие, еже скоро обрел еси, о чадо? Он же рече: еже даде Господь Бог твой предо мною. Рече же Исаак Иакову: приближися ко мне, и осяжу тя, чадо, аще ты еси сын мой Исав, или ни. Приближися же Иаков ко Исааку отцу своему, и осяза его и рече: глас убо глас Иаковль, руце же руце Исавове. И не позна его: бесте бо руце его, яко руце Исава брата его космате. И благослови его и рече: ты ли еси сын мой Исав? Он же рече: аз. И рече: принеси ми, и ям от лова твоего, чадо, да благословит тя душа моя. И принесе ему, и яде, и принесе ему вино, и пи. И рече ему Исаак отец его: приближися ко мне и облобызай мя, чадо. И приближився лобыза его: и обоня воню риз его, и благослови его и рече: се, воня сына моего, яко воня нивы исполнены, юже благослови Господь: и да даст тебе Бог от росы небесныя и от тука земли, и множество пшеницы и вина: и да поработают тебе языцы, и да поклонятся тебе князи, и буди господин брату твоему, и поклонятся тебе сынове отца твоего: проклинаяй тя проклят, благословляяй же тя благословен. И бысть по еже престати Исааку благословляющу Иакова сына своего: и бысть егда изыде Иаков от лица Исаака отца своего, и Исав брат его прииде с ловитвы. Сотвори же и той снеди и принесе отцу своему, и рече отцу: да востанет отец мой, и да яст от лова сына своего, яко да благословит мя душа твоя. И рече ему Исаак отец его: кто еси ты? Он же рече: аз есмь сын твой первенец Исав. Ужасеся же Исаак ужасом велиим зело и рече: кто убо уловивый мне лов и принесый ми? И ядох от всех, прежде неже приити тебе, и благослових его, и благословен будет. Бысть же егда услыша Исав глаголы отца своего Исаака, возопи гласом велиим и горьким зело, и рече: благослови убо и мене, отче. Рече же ему: пришед брат твой с лестию, взя благословение твое. И рече (Исав): праведно наречеся имя ему Иаков: запя бо мя се уже вторицею, и первенство мое взя, и ныне взя благословение мое. И рече Исав отцу своему: не оставил ли еси (и) мне благословения, отче? Отвещав же Исаак, рече Исаву: аще господина его сотворих тебе, и всю братию его сотворих рабы ему, пшеницею и вином утвердих его: тебе же что сотворю, чадо? Рече же Исав ко отцу своему: еда едино есть благословение у тебе, отче? Благослови убо и мене, отче. Умилившуся же Исааку, возопи гласом велиим Исав и восплакася. Отвещав же Исаак отец его, рече ему: се, от тука земли будет вселение твое, и от росы небесныя свыше: и мечем твоим жити будеши, и брату твоему поработаеши: будет же (время) егда низложиши и отрешиши ярем его от выи твоея. И враждоваше Исав на Иакова о благословении, имже благослови его отец его.


Иже хранит заповеди, соблюдает свою душу, а нерадяй о своих путех погибнет. Милуяй нища взаим дает Богови, по даянию же его воздастся ему. Наказуй сына твоего, тако бо будет благонадежен: в досаждение же не вземлися душею твоею. Злоумен муж много отщетится: аще же губитель есть, и душу свою приложит. Слушай, сыне, отца твоего наказания, да мудр будеши в последняя твоя. Многи мысли в сердцы мужа: совет же Господень во век пребывает. Плод мужеви милостыня: лучше же нищь праведный, нежели богат лжив. Страх Господень в живот мужеви: а безстрашный водворится на местех, идеже не наблюдается разум. Скрываяй в недрех руце свои неправедно ниже ко устом своим принесет я. Губителю раны приемлющу, безумный коварнее будет: аще же обличаеши мужа разумна, уразумеет чувство. Безчествуяй отца и отреваяй матерь свою срамоту приимет и поношение. Сын оставляяй хранити наказание отчее поучится словесем злым. Выручаяй отрока несмыслена досаждает оправданию: уста же нечестивых пожрут суд. Уготовляются невоздержным раны, и мучения подобне неразумным.

Так говорит Господь: «Я Господь Бог твой,.. научающий тебя полезному, ведущий тебя по тому пути, по которому должно тебе идти. О, если бы ты внимал заповедям Моим! Тогда мир твой был бы как река, и правда твоя – как волны морские. И семя твое было бы как песок, и происходящие из чресл твоих – как песчинки; не изгладилось бы, не истребилось бы имя его предо Мною» (Ис.48:17–19). Под каким условием? «Выходите из Вавилона» (Ис.48:20). Вавилон – это образ греховности всесторонней. Оставь грех, обратись ко Господу всем сердцем твоим, и Он не помянет беззаконий твоих, и предаст забвению все неправды твои. Опять поступишь в милость к Нему, – и тогда только ходи путем, которому учит Он тебя, и будет, как река мир твой внутренний, как песок – благопомышления сердца твоего, и как персть земли – плоды доброделания твоего.