В пяток 4-я седмицы Великаго Поста. ЦСл текст гражданским шрифтом.

Тако глаголет Господь: приближаются Мне людие сии усты своими, и устнами своими почитают Мя, сердце же их далече отстоит от Мене: всуе же почитают Мя, учаще заповедем человеческим и учениям. Сего ради се Аз приложу, еже преселити люди сия, и преставлю я, и погублю премудрость премудрых и разум разумных сокрыю. Горе творящим глубоко совет, а не Господем: горе в тайне совет творящим, и будут во тьме дела их, и рекут: кто ны виде? и кто ны уразумеет, яже мы творим? Не якоже ли брение скудельника вменитеся? еда речет здание создавшему е: не ты мя создал еси? или творение сотворшему: не разумно мя сотворил еси? Не еще ли мало, и приложится Ливан, аки гора Хермель, и Хермель в дубраву вменится? И услышат в день оный глусии словеса книги [сея], и иже во тьме, и иже во мгле, очи слепых узрят. И возрадуются нищии ради Господа в веселии, и отчаявшиися человецы исполнятся веселия. Исчезе беззаконник, и погибе гордый, и потребишася вси беззаконнующии в злобе, И творящии согрешати человеки в слове: всем же обличающим во вратех претыкание положат, понеже совратиша в неправдах праведнаго. Сего ради тако глаголет Господь на дом Иаковль, егоже определи от Авраама: не ныне постыдится Иаков, ниже ныне лице свое изменит Израиль. Но егда увидят чада их дела Моя, Мене ради освятят имя Мое, и освятят святаго Иаковля, и Бога Израилева убоятся.


Рече Господь Авраму: изыди от земли твоея, и от рода твоего, и от дому отца твоего, и иди в землю юже ти покажу. И сотворю тя в язык велий, и благословлю тя, и возвеличу имя твое, и будеши благословен. И благословлю благословящия тя, и кленущия тя проклену: и благословятся о тебе вся племена земная. И иде Аврам, якоже глагола ему Господь, и идяше с ним Лот. Аврам же бе лет седмидесяти пяти, егда изыде от [земли] Харран. И поят Аврам Сару жену свою, и Лота сына брата своего, и вся имения своя, елика стяжаша, и всякую душу, юже стяжаша в Харране: и изыдоша поити в землю Ханааню. И пройде Аврам землю в долготу ея, даже до места Сихем до дуба высокаго: хананеи же тогда живяху в земли [той]. И явися Господь Авраму, и рече ему: семени твоему дам землю сию. и созда тамо Аврам жертвенник Господу явльшемуся ему.


Незлобивый веру емлет всякому словеси: коварный же приходит в раскаяние. Премудр убоявся, уклонится от зла: безумный же на себе надеявся, смешавается со беззаконным. Острояростный без совета творит: муж же мудрый многая терпит. Разделяют безумнии злобу: коварнии же удержат чувство. Поползнутся злии пред благими, и нечестивии послужат пред дверьми праведных. Друзи возненавидят другов убогих: друзи же богатых мнози. Безчестяй убогия, согрешает: милуяй же нищия, блажен. Заблуждающии [неправедницы] делают злая: милость же и истину делают благии. не ведят милости и веры делателие злых милостыни же и веры у делателей благих. Во всяком пекущемся есть изобилие: любосластный же и безпечальный в скудости будет. Венец премудрых богатство их: житие же безумных зло. Избавит от злых душу свидетель верен: разжизает же лживыя лестный. В страсе Господни упование крепости: чадом же своим оставит утверждение [мира].

"Сказал Господь Аврааму: пойди из земли твоей, от родства твоего и из дома отца твоего, в землю, которую Я укажу тебе" (Быт. 12, 1). Это явный образ того изменения сердечного, которое совершается в истинно - верующих, когда они искренно берут на себя крест свой и последуют Христу. Оставляют они отца своего - самость, распиная ее самоотвержением; оставляют род свой - свои личные греховные склонности, страсти и привычки, распявши их решимостью неуклонно во всем следовать страстеубийственным заповедям Господним; оставляют землю свою, всю область греховную, мир, со всеми его требованиями, распиная его решимостью быть для него чуждым, хотя бы для этого необходимо было потерпеть не только потери в имуществе и весе общественном, но и самую смерть.