В понедельник 3-я седмицы Великаго поста. ЦСл текст гражданским шрифтом.

Господа Сил, Того освятите, и Той будет тебе в страх. И аще будеши уповая на Него, будет тебе во освящение, а не якоже о камень претыкания преткнешися, ниже яко о камень падения: домове же Иаковли в пругле, и в раздолии седящии во Иерусалиме. Сего ради изнемогут в них мнози, и падут, и сокрушатся, и приближатся, и яти будут человецы в твердыни суще. Тогда явлени будут печатлеющии закон, еже не учитися. И речет: пожду Бога отвращшаго лице Свое от дому Иаковля и уповая буду Нань. Се, аз и дети, яже ми даде Бог: и будут знамения и чудеса в дому Израилеве от Господа Саваофа, иже обитает на горе Сион. И аще рекут к вам: изыщите чревоволшебников и от земли возглашающих, тщесловующих, иже от чрева глашают, не язык ли к Богу своему взыщет? Что испытуют мертвыя о живых? Закон бо в помощь даде, да рекут не якоже слово сие, заньже не леть дары даяти. И приидет на вы жесток глад, и будет, егда взалчете, скорбни будете и зло речете князю и отечеству: и воззрят на небо горе, и на землю низу призрят, и се, скудость тесна и тма, скорбь и теснота и тма, якоже не видети: и не оскудеет в тесноте сый даже до времене. Сие прежде испий, скоро твори, страно Завулоня и земле Неффалимля, и прочии при мори живущии, и об ону страну Иордана, Галилеа языков. Людие ходящии во тме видеша свет велий: живущии во стране и сени смертней, свет возсияет на вы. Множайшии людие, яже извел еси, в веселии Твоем: и возвеселятся пред тобою, якоже веселящиися в жатву, и якоже веселятся делящии корысти. Зане отятся ярем лежай на них, и жезл, иже на выи их: жезл бо истязующих разсыпа Господь, якоже в день, иже на Мадиама. Яко всякую одежду собранну лестию и ризу с примирением отдадут, и восхотят, да быша огнем сожжены были. Яко отроча родися нам, Сын, и дадеся нам, егоже началство бысть на раме Его: и нарицается имя Его: велика совета Ангел, Чуден, Советник, Бог крепкий, Властелин, Князь мира, Отец будущаго века: приведу бо мир на князи, мир и здравие Ему. И велие началство Его, и мира Его несть предела на престоле Давидове и на царстве его, исправити е и заступити его в суде и правде, отныне и до века: ревность Господа Саваофа сотворит сия.


Ное человек праведен, совершен сый в роде своем, Богу угоди Ное. Роди же Ное три сыны, Сима, Хама, Иафета. Растлеся же земля пред Богом, и наполнися земля неправды. И виде Господь Бог землю, и бе растленна: яко растли всяка плоть путь свой на земли: И рече Господь Бог Ною: время всякаго человека прииде пред Мя, яко исполнися земля неправды от них: и се Аз погублю их и землю. Сотвори убо себе ковчег от древ [негниющих] четвероугольных: гнезда сотвориши в ковчезе, и посмолиши его внутрьуду и внеуду смолою. И тако сотвориши ковчег: трех сот лактей долгота ковчега, и пятидесяти лактей широта, и тридесяти лактей высота его. Собирая сводом сотвориши ковчег, и в лакоть свершиши его свыше: дверь же ковчега сотвориши от страны: обиталища двокровна и трекровна сотвориши в нем. Аз же се наведу потоп, воду на землю, погубити всяку плоть, в нейже есть дух жизни под небесем: и елика суть на земли, скончаются. И поставлю завет Мой с тобою: внидеши же в ковчег ты, и сынове твои, и жена твоя и жены сынов твоих с тобою. И от всех скотов, и от всех гад, и от всех зверей, и от всякия плоти, два два от всех введеши в ковчег, да питаеши с собою: мужеский пол и женский будут. От всех птиц пернатых по роду, и от всех скотов по роду, и от всех гадов ползающих по земли по роду их, два два от всех внидут к тебе, питатися с тобою, мужеский пол и женский. Ты же возми себе от всех брашен, яже имате ясти, и собереши к себе, и будут тебе и оным брашно. И сотвори Ное вся, елика заповеда ему Господь Бог, тако сотвори.


Сыне, ты премудрость проповеждь, да разум послушает тебе. На высоких бо краех есть, посреде же стезь стоит: При вратех бо сильных приседит, во входех же поется. Вас о человецы, молю, и вдаю мой глас сыном человеческим. Уразумейте незлобивии коварство, ненаказаннии же приложите сердце. Послушайте мене: честная бо реку, и изнесу от устен правая. Яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно: Вся права разумевающим, и права обретающим разум. Приимите наказание, а не сребро, и разум паче злата искушена: избирайте же ведение паче злата чиста. Лучше бо премудрость камений многоценных, всякое же честное недостойно ея есть. Аз премудрость вселих совет и разум, и смысл аз призвах. Страх Господень ненавидит неправды, досаждения же и гордыни, и пути лукавых: возненавидех же аз развращенныя пути злых. Мой совет и утверждение, мой разум, моя же крепость. Мною царие царствуют, и сильнии пишут правду. Мною вельможи величаются, и властители мною держат землю. Аз любящия мя люблю, ищущии же мене обрящут благодать. Богатство и слава моя есть, и стяжание многих и правда. Лучше есть плодити мене паче злата и камения драга: мои же плоды лучше сребра избранна. В путех правды хожду, и посреде стезь оправдания живу: Да разделю любящим мя имение, и сокровища их исполню благих.

"Страх Господень ненавидит неправды" (Прит. 8, 13); а если ненавидит, то прогонит их; если прогонит, то душа станет чиста от них и явится посему правою перед Господом. А это и есть все, чего теперь с такою заботою ищем. Стало быть, восстанови в себе страх Божий и поддерживай его, и будешь обладать самым могущественным средством к самоисцелению. Страх Господень не допустит тебя согрешить, и он же заставит тебя делать всякое добро при всяком к тому случае. И будет у тебя исполняться заповедь: "уклоняйся от зла и делай добро" (Пс. 33, 15), которую дает пророк ищущим истинной жизни. Как дойти до страха Божия? Ищи и обрящешь . Здесь нельзя сказать: то и то сделай; страх Божий есть духовное чувство, сокровенно зачинающееся в сердце от его обращения к Богу. Размышление помогает, помогает и напряжение себя на это чувство; но делом оно дается от Господа. Взыщи его как дара, и дан тебе будет. И когда дан будет, тогда только слушайся его беспрекословно: он выправит все твои неправды.