В пяток 2-я седмицы. ЦСл текст гражданским шрифтом

Бысть во дни Ахаза сына Иоафамля, сына Озии, царя Иудина, взыде Расин царь Арамль, и Факей сын Ромелиев, царь Израилев на Иерусалим воевати на него, и не возмогоша разорити его. И возвестися в дому Давидове, глаголя: совещася Арам со Ефремом. и ужасеся душа его, и душа людей его: якоже в дубраве древо ветром восколеблется. И рече Господь ко Исаии: изыди во сретение Ахазу, ты, и оставшийся Иасув сын твой, к купели горняго пути, села белильнича. И речеши ему: блюди еже молчати, и не бойся, ниже душа твоя да изнеможет о двою древу главень дымящихся сих: егда бо гнев ярости Моея будет, паки исцелю. Сын же Арамль, и сын Ромелиев, яко совещаста совет лукавый на тя, глаголюще: Взыдем во Иудею, и собеседовавше с ними отвратим я к нам, и воцарим в ней сына Тавеилева. Сия же глаголет Господь Саваоф, не пребудет совет сей, ниже сбудется: По глава Араму Дамаск, и глава Дамаску Расин: но еще шестьдесят и пять лет, оскудеет царство Ефремово от людей. Глава же Ефремови Соморон, и глава Соморону сын Ромелиев: и аще не уверите, ниже имате разумети. И приложи Господь глаголати ко Ахазу, рекий: Проси себе знамения от Господа Бога твоего во глубину, или в высоту. И рече Ахаз: не имам просити, ниже искушу Господа. И рече [Исаиа] слышите убо доме Давидов, еда мало вам есть труд даяти человеком, и како даете Господеви труд? Сего ради даст Господь Сам вам знамение.


Бе Ное лет пяти сот, и роди сыны три, Сима, Хама, Иафета. И бысть егда начаша человецы мнози бывати на земли, и дщери родишася им: Видевше же сынове Божии дщери человечи, яко добры суть, пояша себе жены от всех, яже избраша. И рече Господь Бог: не имать Дух Мой пребывати в человецех сих во век, зане суть плоть: будут же дние их лет сто двадесять. Исполини же бяху на земли во дни оны: и потом, егда вхождаху сынове Божии к дщерем человеческим, и рождаху себе, тии бяху исполини, иже от века человецы именитии. Видев же Господь Бог, яко умножишася злобы человеков на земли, и всяк помышляет в сердце своем прилежно на злая во вся дни и помысли Бог, яко сотвори человека на земли, и размысли. И рече Бог: потреблю человека, егоже сотворих от лица земли, от человека даже до скота, и от гад даже до птиц небесных, зане размыслих, яко сотворих я. Ное же обрете благодать пред Господем Богом.


Сыне, храни законы отца твоего, и не отрини наказания матере твоея: Навяжи же я на твою душу присно, и обяжи их о твоей выи. Егда ходиши, води ю, и с тобою да будет: егда же спиши, да хранит тя, да востающу ти глаголет с тобою. Зане светильник заповедь закона, и свет, и путь жизни, и обличение, и наказание: Еже сохранити тя от жены мужаты, и от наваждения языка чуждаго. Сыне, да не победит тя доброты похоть, ниже уловлен буди твоима очима, ниже да совосхитишися веждами ея: Цена бо блудницы, елика единаго хлеба: жена же мужей честныя души уловляет. Ввяжет ли кто огнь в недра, риз же [своих] не сожжет ли? Или ходити кто будет на углиях огненных, ног же не сожжет ли? Тако вшедый к жене мужатей не без вины будет, ниже всяк прикасаяйся ей. Не дивно, аще кто ят будет крадый: крадет бо, да насытит душу свою алчущую: Аще же ят будет, воздаст седмерицею, и вся имения своя дав избавит себе. Прелюбодей же за скудость ума погибель души своей содевает. Болезни же и безчестие понесет: поношение же его не загладится во век. Исполнена бо ревности ярость мужа ея: не пощадит в день суда. Не изменит ни единою ценою вражды, ниже разрешится многими дарми. Сыне, храни моя словеса, моя же заповеди скрый у себе: сыне, чти Господа, и укрепишися: кроме же Его не бойся иного.

"Не вечно Духу Моему быть пренебрегаемым человеками; потому что они плоть" (Быт. 6, 3). В человеке две противоположности, а сознание одно - личность человеческая. Характер этой личности определяется тем, на какую сторону она склоняется. Если она на стороне духа, - будет человек духовен, если она на стороне плоти - будет человек плотян. Дух и в плотяном не исчезает, но бывает порабощен, и голоса не имеет. Он тут становится подъяремным и служит плоти, как раб госпоже своей, изобретая всевозможные для нее услаждения. И в духовном плоть не исчезает, но подчиняется духу и ему работает, теряя свои естественные права на пищу через пост, на сон через бдение, на покой через непрерывный труд и утомление, на услаждение чувств через уединение и молчание. Бог не пребывает там, где царит плоть, ибо орган общения его с человеком есть дух, который здесь не в своем чине. В первый раз чувствуется Божие приближение, когда дух начинает предъявлять свои права в движениях страха Божия и совести. Когда же и сознание со свободой станут на эту сторону, тогда Бог общится с человеком и начинает пребывать в нем. С той минуты пойдет одухотворение души и плоти, всего внутреннего и внешнего человека, пока Бог станет всяческая во всех в человеке том, и человек, одухотворившись, обожится. Какое дивное преимущество и как мало оно помнится, ценится и ищется!