Во вторник 2-я седмицы - ЦСл текст гражданским шрифтом

Тако глаголет Господь: виноград Господа Саваофа дом Израилев есть, и человек Иудин, новый сад возлюбленный: ждах, да сотворит суд, сотвори же беззаконие и неправду, но вопль. Горе совокупляющим дом к дому, и село к селу приближающим, да ближнему отымут что: еда вселитеся едини на земли? Услышашася бо во ушесах Господа Саваофа сия: аще бо будут домове мнози, в запустение будут велиции и добрии, и не будут живущии в них. Идеже бо возорют десять супруг волов, сотворит корчаг един, и сеяй артавас шесть, сотворит меры три. Горе востающим заутра, и сикер гонящим, ждущим вечера: вино бо сожжет я. С гусльми бо и певницами, и тимпаны, и свирельми вино пиют, на дела же Господня не взирают, и дел руку Его не помышляют. Убо пленени быша людие Мои, за еже не ведети им Господа, и множество бысть мертвых глада ради, и жажды водныя. И разшири ад душу свою, и разверзе уста своя, еже не престати: и снидут славнии, и велицыи, и богатии, и губители их, и веселяйся в нем. И смирится человек, и обезчестится муж, и очи высокоглядающии смирятся. И вознесется Господь Саваоф в суде, и Бог Святый прославится в правде.


Рече Каин ко Авелю брату своему: пойдем на поле. и бысть внегда быти им на поли, воста Каин на Авеля брата своего, и уби его. И рече Господь Бог ко Каину: где есть Авель брат твой? и рече, не вем: еда страж брату моему есмь аз? И рече Господь: что сотворил еси сие? глас крове брата твоего вопиет ко Мне от земли. И ныне проклят ты на земли, яже разверзе уста своя, прияти кровь брата твоего от руки твоея. Егда делаеши землю, и не приложит силы своея дати тебе: стеняй, и трясыйся будеши на земли. И рече Каин ко Господу Богу: вящшая вина моя, еже оставитися ми. Аще изгониши мя днесь от лица земли, и от лица Твоего скрыюся, и буду стеня и трясыйся на земли, и будет всяк обретаяй мя, убиет мя. И рече ему Господь Бог: не тако, всяк убивый Каина, седмижды отмстится. И положи Господь Бог знамение на Каине, еже не убити его всякому обретающему его.


Сыне, моей премудрости внимай, к моим же словесем прилагай ухо твое. Да сохраниши мысль благую: чувство же моих устен заповедает тебе. Не внимай злей жене: мед бо каплет от устен жены блудницы, яже на время наслаждает твой гортань: Последи же горчае желчи обрящеши, и изощрену паче меча обоюду остра. Безумия бо нозе низводят употребляющих ю со смертию во ад, стопы же ея не утверждаются: На пути бо животныя не находит, заблужденна же течения ея и неблагоразумна. Ныне убо сыне, послушай мене, и не отриновенна сотвори моя словеса: Далече от нея сотвори путь твой, и не приближися к дверем домов ея: Да не предаст иным живота твоего, и твоего жития не милостивным. Да не насытятся инии твоея крепости, твои же труды в домы чуждыя внидут. И раскаешися на последок твой, егда иструтся плоти тела твоего, и речеши: Како возненавидех наказание, и от обличений уклонися сердце мое? Не послушах гласа наказующаго мя, и ко учащему мя не прилагах уха моего: Вмале бех во всяком зле посреде церкве и сонмища. Сыне, пий воды от твоих сосудов, и от твоих кладенцев источника.

"И сказал Каин Господу: наказание мое больше, нежели снести можно" (Быт. 4, 13). Можно ли было так говорить перед лицом Бога, строгого, конечно, в правде, но и всегда готового миловать искренно кающегося? Зависть помрачила здравые понятия, преступление обдуманное ожесточило сердце, и вот Каин грубо отвечает Самому Богу: "разве я сторож брату моему?" (Быт. 4, 9) Бог хочет умягчить его каменное сердце молотом строгого суда Своего, - а он не поддается, и, замкнувшись в своем огрубении, предается той участи, какую изготовил себе завистью и убийством. То дивно, что после того он жил, как и все: имел детей, устраивал семейный быт и житейские отношения держал; печать же отвержения и отчаяния все лежала на нем. Стало быть это дело внутреннее, которое совершается в совести, из сознания своих отношений к Богу, под действием тяготящих ее дел, страстей и греховных навыков. Да внемлют этому ныне в особенности! Но вместе да воскресят веру, что нет греха, побеждающего милосердие Божие, хотя на умягчение сердца, конечно, потребуются и время и труд. Но ведь - или спасение, или погибель!