В понедельник 2-я седмицы - Церковнославянский гражданским шрифтом

Тако глаголет Господь: В день оный возсияет Бог в совете со славою на земли, еже вознести и прославити останок Израиля. И будет останок в Сионе, и останок во Иерусалиме, святи нарекутся вси, написаннии в жизнь во Иерусалиме. Яко отмыет Господь скверну сынов и дщерей Сионских, и кровь Иерусалимску очистит от среды их духом суда, и духом зноя. И приидет Господь, и будет все место горы Сиони, и вся яже окрест ея осенит облак во дни, и яко дыма и света огненна горяща в нощи, всею славою покрыется: И будет в сень от зноя, и в покров и в сокровение от жестости и дождя. Воспою ныне возлюбленному песнь, возлюбленнаго моего винограду моему: виноград бысть возлюбленному в розе, на месте тучне. И ограждением оградих, и окопах, и насадих лозу избранну, и создах столп посреде его, и предточилие ископах в нем: и ждах, да сотворит гроздие, и сотвори терние, и ныне живущии во Иерусалиме, и человече Иудин, судите между мною и виноградом моим. Что сотворю еще винограду моему, и не сотворих ему? Занеже ждах, да сотворит гроздие, сотвори же терние. Ныне убо возвещу вам, что аз сотворю винограду моему: отыму ограждение его, и будет в разграбление, и разорю стену его, и будет в попрание. И оставлю виноград мой, и ктому не обрежется, ниже покопается, и взыдет на нем, якоже на лядине, терние: и облаком заповем, еже не одождити на него дождя. Виноград бо Господа Саваофа, дом Израилев есть, и человек Иудин, новый сад возлюбленный.


Сотвори Господь Бог Адаму и жене его ризы кожаны, и облече их. И рече Бог: се Адам бысть яко един от Нас, еже разумети доброе и лукавое. и ныне да не когда прострет руку свою, и возмет от древа жизни, и снест, и жив будет во век. И изгна его Господь Бог из рая сладости, делати землю: от неяже взят бысть. И изрине Адама, и всели его прямо рая сладости: и пристави херувима, и пламенное оружие обращаемое, хранити путь древа жизни. Адам же позна Еву жену свою, и заченши роди Каина. и рече: стяжах человека Богом. И приложи родити брата его Авеля. И бысть Авель пастырь овец: Каин же бе делаяй землю. И бысть по днех принесе Каин от плодов земли жертву Богу: И Авель принесе и той от первородных овец своих, и от туков их: и призре Бог на Авеля и на дары его: На Каина же и на жертвы его не внят, и опечалися Каин зело, и испаде лице его. И рече Господь Бог Каину: вскую прискорбен был еси? И вскую испаде лице твое? Еда аще право принесл еси, право же не разделил еси, не согрешил ли еси? Умолкни: к тебе обращение его, и ты тем обладаеши.


Господь гордым противится, смиренным же дает благодать. Славу премудрии наследят, нечестивии же вознесоша безчестие. Послушайте дети наказания отча, и внемлите разумети помышление. Дар бо благий дарую вам: моего закона не оставляйте. Сын бо бых и аз отцу послушливый, и любимый пред лицем матере: Иже глаголаша, и учиша мя: да утверждается наше слово в твоем сердце, храни заповеди, не забывай. Стяжи премудрость, стяжи разум: не забуди, ниже презри речения моих уст, ниже уклонися от глагол уст моих. Не остави ея, и имется тебе: возжелей ея, и соблюдет тя. Начало премудрости, стяжати премудрость, и во всем стяжании твоем стяжи разум. Огради ю, и вознесет тя: почти ю, да тя обымет: Да даст главе твоей венец благодатей, венцем же сладости защитит тя. Слыши сыне, и приими моя словеса, и умножатся лета живота твоего, да ти будут мнози пути жития. Путем бо премудрости учу тя, наставляю же тебе на течения правая: Аще бо ходиши, не запнутся стопы твоя: аще ли течеши, не утрудишися. Имися моего наказания, не остави: но сохрани е себе жизнь твою: На пути нечестивых не иди, ниже возревнуй путем законопреступных. На немже аще месте воя соберут, не иди тамо: уклонися же от них, и измени. Не уснут бо, аще зла не сотворят: отымется сон от них, и не спят. Тии бо питаются пищею нечестия, вином же законопреступным упиваются. Путие же праведных подобне свету светятся: предходят, и просвещают, дондеже исправится день. Путие же нечестивых темни: не ведят, како претыкаются. Сыне, моим глаголом внимай, к моим же словесем прилагай ухо твое. Да не оскудеют ти источницы твои, храни я в сердце твоем: Живот бо суть всем обретающим я, и всей плоти их исцеление.

"Больше всего хранимого храни сердце твое; потому что из него источники жизни" (Прит. 4, 23). Поговевши, исповедавшись и причастившись св. Таин, христианин возобновляет в себе благодатные источники, открытые в нас св. Крещением, которые потом столько раз были засоряемы нерадением и падениями, и столько раз очищаемы покаянием. Теперь снова очищены они после последних падений. Будем же хранить их, по крайней мере с этого времени, от засорения вновь невниманием, рассеянностью и небрежением о тех действиях, которыми поддерживается чистота и исправное течение вод их. Продолжим пощение, не дадим воли чувствам, не прекратим усердных молитв и слез, не забудем дел любви, взыщем слышания слова Божия, более же всего да беседуем с Господом, Который в нас, и этою беседою да поддерживаем в себе страх Божий и ревность к богоугождению, в которых собственно источник нашей жизни духовной.