Вторник первыя седмицы Великаго поста. ЦСл.

Тако глаголет Господь: аще хощете, и послушаете Мене, благая земли снесте. Аще же не хощете, ниже послушаете Мене, меч вы пояст: уста бо Господня глаголаша сия. Како бысть блудница, град верный Сион, полн суда, в немже правда почиваше, ныне же [в нем] убийцы? Сребро ваше неискушено, корчемницы твои мешают вино с водою. Князи твои не покаряются, общницы татем, любяще дары, гоняще воздаяние, сирым не судящии, и суду вдовиц не внимающии. Сего ради тако глаголет Владыка Господь Саваоф: горе крепким во Израили: не престанет бо ярость Моя на противныя, и суд врагом Моим сотворю: И наведу руку Мою на тя, и разжегу в чистоту, непокаряющихся же погублю, и отыму всех беззаконных от тебе, и всех гордых смирю. И приставлю судии твои якоже прежде, и советники твоя яко от начала: и по сих наречешися град правды, мати градовом, верный Сион. С судом бо спасется пленение его и с милостынею. И сокрушатся беззаконнии и грешницы вкупе: и оставившии Господа скончаются. Занеже постыдятся о идолех своих, ихже сами восхотеша, и посрамятся о садех своих, ихже возжелеша: Будут бо яко теревинф отметнувший листвия [своя,] и яко вертоград не имый воды. И будет крепость их яко стебль изгребия и делания их яко искры огненныя, и сожгутся беззаконницы и грешницы вкупе, и не будет угашаяй. Слово бывшее от Господа ко Исаии сыну Амосову о Иудеи, и о Иерусалиме. яко будет в последняя дни явлена гора Господня, и дом Божий на версе гор, и возвысится превыше холмов: и приидут к ней вси языцы. И пойдут языцы мнози, и рекут: приидите, и взыдем на гору Господню, и в дом Бога Иаковля, и возвестит нам путь Свой, и пойдем по нему.


Рече Бог, да будут светила на тверди небесней, освещати землю, и разлучати между днем, и между нощию: и да будут в знамения, и во времена, и во дни, и в лета. И да будут в просвещение на тверди небесней, яко светити по земли: и бысть тако. И сотвори Бог два светила великая: светило великое в начала дне, и светило меньшее в начала нощи, и звезды. И положи я Бог на тверди небесней, яко светити на землю, И владети днем и нощию, и разлучати между светом, и между тьмою: и виде Бог, яко добро. И бысть вечер, и бысть утро, день четвертый. И рече Бог: да изведут воды гады душ живых, и птицы летающия по земли, по тверди небесней: и бысть тако. И сотвори Бог киты великия, и всяку душу животных гадов, яже изведоша воды по родом их, и всяку птицу пернату по роду: и виде Бог яко добра. И благослови я Бог, глаголя: раститеся, и множитеся, и наполните воды яже в морях: и птицы да умножатся на земли. И бысть вечер, и бысть утро, день пятый.


Премудрость во исходех поется, в стогнах же дерзновение водит. На краех же стен проповедуется, у врат же сильных приседит, во вратех же града дерзающи глаголет. Елико убо время незлобивии держатся правды, не постыдятся: безумнии же досады суще желателие, нечестивии бывше, возненавидеша чувство, И повинни быша обличением. се предложу вам Моего дыхания речение: научу же вас Моему словеси. Понеже звах, и не послушасте, и простирах словеса, и не внимасте, Но отметасте Моя советы, и Моим обличением не внимасте: убо и Аз вашей погибели посмеюся, порадуюся же, егда приидет вам пагуба. И егда приидет на вы внезапу мятеж, низвращение же подобно бури приидет, или егда приидет вам печаль и градоразорение, или егда найдет на вы пагуба. Будет бо, егда призовете Мя, Аз же не послушаю вас: взыщут Мене злии, и не обрящут. возненавидеша бо премудрость, словесе же Господня не прияша: Ниже хотеша внимати Моим советом, ругахуся же Моим обличением. Темже снедят своих путей плоды, и своего нечестия насытятся. Ибо, зане обидеша младенцев, убиени будут, и истязание нечестивыя погубит. Мене же слушаяй вселится на уповании, и почиет без страха от всякаго зла.

Предлагаются чтения о сотворении, первобытном состоянии падения и обетовании спасения в Господе нашем Иисусе Христе. Внимай и поучайся! Теперь для тебя время воссоздания твоего. Припади ко Господу, - и Он даст тебе свет, который просветит тьму твою греховную, поставит твердь среди мятущихся мыслей твоих и желаний грехолюбивого сердца твоего - благое намерение твердо и неуклонно работать Ему, устроит сушу и море, всему даст в тебе свое место. Тогда начнешь произращать сначала злаки, былие травное и дерева - начатки добродетелей, а потом и живые твари - совершенно духовные и богоугодные дела, пока, наконец, восстановится в тебе образ и подобие Божие, как создан ты был в начале. Все это сотворит тебе Господь в эти шесть дней духовного творения, говения твоего, если будешь проходить его со вниманием, благоговеинством и сокрушением сердца.