Вторник 14-й по Пятидесятнице. ЦСл.

Братие, боюся, еда како пришед, не яцех же хощу, обрящу вас, и аз обрящуся вам, якова же не хощете: да не како будут рвения, зависти, ярости, рети, клеветы, шептания, кичения, нестроения: да не паки пришедша мя смирит Бог мой у вас, и восплачуся многих прежде согрешших и не покаявшихся о нечистоте и блужении и студоложствии, яже содеяша. Третицею се гряду к вам: при устех двою или триех свидетелей станет всяк глагол. Прежде рех и предглаголю, яко у вас быв второе, и отсутствуя ныне пишу прежде согрешившым и прочым всем, яко аще прииду паки, не пощажду.


Рече Господь Своим учеником: блюдите что слышите: в нюже меру мерите, возмерится вам, и приложится вам слышащым: иже бо аще имать, дастся ему: а иже не имать, и еже имать, отимется от него. И глаголаше: тако есть (и) Царствие Божие, якоже человек вметает семя в землю, и спит, и востает нощию и днию: и семя прозябает и растет, якоже не весть он: от себе бо земля плодит прежде траву, потом клас, таже исполняет пшеницу в класе: егда же созреет плод, абие послет серп, яко наста жатва. И глаголаше: чесому уподобим Царствие Божие? Или коей притчи приложим е? Яко зерно горушично, еже егда всеяно будет в земли, мнее всех семен есть земных: и егда всеяно будет, возрастает, и бывает более всех зелий, и творит ветви велия, яко мощи под сению его птицам небесным витати. И таковыми притчами многими глаголаше им слово, якоже можаху слышати. Без притчи же не глаголаше им словесе: особь же учеником Своим сказаше вся.