Суббота 6-я по Пятидесятнице. ЦСл.

Братие, истину глаголю о Христе, не лгу, послушествующей ми совести моей Духом Святым, яко скорбь ми есть велия и непрестающая болезнь сердцу моему: молил бых ся бо сам аз отлучен быти от Христа по братии моей, сродницех моих по плоти, иже суть Израилите, ихже всыновление и слава, и завети и законоположение, и служение и обетования: ихже отцы, и от нихже Христос по плоти, сый над всеми Бог благословен во веки, аминь.


Во время оно, князь некий пришед кланяшеся Иисусу, глаголя, яко дщи моя ныне умре: но пришед возложи на ню руку Твою, и оживет. И востав Иисус по нем иде, и ученицы Его. И се, жена кровоточива дванадесяте лет, приступльши созади, прикоснуся воскрилию ризы Его, глаголаше бо в себе: аще токмо прикоснуся ризе Его, спасена буду. Иисус же обращься и видев ю, рече: дерзай, дщи, вера твоя спасе тя. И спасена бысть жена от часа того. И пришед Иисус в дом княжь, и видев сопцы и народ молвящь, глагола им: отидите, не умре бо девица, но спит. И ругахуся Ему. Егда же изгнан бысть народ, вшед ят ю за руку: и воста девица. И изыде весть сия по всей земли той.