Среда 1-я по Пятидесятнице. ЦСл.

Братие, открывается гнев Божии с небесе на всякое нечестие и неправду человеков, содержащих истину в неправде. Зане разумное Божие яве есть в них, Бог бо явил есть им: невидимая бо Его, от создания мира твореньми помышляема, видима суть, и присносущная сила Его и Божество, во еже быти им безответным. Занеже разумевше Бога, не яко Бога прославиша или благодариша, но осуетишася помышлении своими, и омрачися неразумное их сердце. Глаголющеся быти мудри, объюродеша, и измениша славу нетленнаго Бога в подобие образа тленна человека и птиц и четвероног и гад. Темже и предаде их Бог в похотех сердец их в нечистоту, во еже сквернитися телесем их в себе самех. Иже премениша истину Божию во лжу, и почтоша и послужиша твари паче Творца, Иже есть благословен во веки, аминь. Сего ради предаде их Бог в страсти безчестия. И жены бо их измениша естественную подобу в презестественную. Такожде и мужи, оставльше естественную подобу женска пола, разжегошася похотию своею друг на друга, мужи на мужех студ содевающе, и возмездие, еже подобаше прелести их, в себе восприемлюще.


Рече Господь Своим учеником: Глаголю вам, яко аще не избудет правда ваша паче книжник и фарисей, не внидете в Царствие Небесное. Слышасте, яко речено бысть древним: не убиеши: иже (бо) аще убиет, повинен есть суду. Аз же глаголю вам, яко всяк гневаяйся на брата своего всуе повинен есть суду: иже бо аще речет брату своему: рака, повинен есть сонмищу: а иже речет: уроде, повинен есть геенне огненней. Аще убо принесеши дар твой ко олтарю и ту помянеши, яко брат твой имать нечто на тя: остави ту дар твой пред олтарем и шед прежде смирися с братом твоим, и тогда пришед принеси дар твой. Буди увещаваяся с соперником твоим скоро, дондеже еси на пути с ним, да не предаст тебе соперник судии, и судия тя предаст слузе, и в темницу ввержен будеши: аминь глаголю тебе: не изыдеши оттуду, дондеже воздаси последний кодрант.